موضوع مضحك اوى بس يا ريت تقروه للاخر بالله عليكم

ليه لما تكون بطارية الريموت ضعيفة نفضل ندوس على الزراير جامد
احنا كدة بنشحنها مثلا

......وليه لما تكون راكب مع حد عربية ومش عارفين الطريق ودخلتوا شارع غلط يقوم موطى الكاسيت او الراديو اللى شغال
قال كدة عرف الطريق المظبوط ازاى

ولا واحد يقلك على حاجة هدية مجانية
على اساس ان بيجيلنا هدايا بفلوس

او لما تكون جوة اوضتك فالشتا وسامع صوت المطر وتقول هى السما بتمطر برة
يعنى هى عمرها عملتها جوة عشان المرة دى تعملها برة

او لما يكون النقاش شغال فالشقة وانت عارف ان الحيطة لسة طرية
وبرضه تحط صباعك عليها

او لما تكون واقف مستنى الاسانسير ويتأخر تفضل تهرى الزرار لحد ما ينزل
انت كدة بتأنبه وتحسسه بالذنب عشان ينجز فالنزول يعنى

او تكون واقف برضه قصاد نفس الاسانسير بعد ماهريت الزرار ويجى واحد تانى يعمل نفس اللى انت عملته
معتبرا ان حضرتك كيس جوافة واقف

وبرضه قصاد نفس الاسانسير اللى زهق منك ومن اللى جنبك
تلاقى اللى جنبك دة اول ماجه يقلك طالع؟
لا واقف بتشمس

او لما تكون بتأكل طفل صغير تلاقى نفسك وانت بتحطله المعلقة فى بقه
انت كمان بتفتح بقك

او لما نصحى من النوم تبقى نايم بتاع عشر ساعات ولا حاجة وتقول هما عشر دقايق بس
اخطف حلم سريع

او لما ترجع من الكلية للبيت يقولولك انت جيت
لأ باعت خيالى يستكشف الجو الاول

ولما تدخل عالسرير ,انت هتنام
لأهتحنط لغاية الصبح

وبعدها بنص ساعة
حبيبى انت نمت
ما لو نايم اكيد مش هرد

طب ليه ما مبتحسش انك عاوز تنام الا وانت بتصلى انما بمجرد الامام ما يسلم تحس ان عشرميت عفريت ومشاريب الحيوية اللى فالدنيا صبت فيك
للدرجة دى شيطانك اقوى منك يا اخى ان كيد الشيطان كان ضعيفا

ولا لما تكون مدرسة المشاغبين والعيال كبرت شغالة ممكن نقعدلها لبعد الفجر كمان عادى والتلفزيون ميسخنش والكهربا متسحبش
والتلفزيون توشيبا بيستحمل على رأى الشيخ وجدى غنيم

انما نقعد نسهر عشان صلاة الفجر لأ ورايا مواعيد الصبح ومشوار مش عارف فين ولمين
انما صلاة فجر ولا صلاة قيام ولا قرأن
ما
يستاهلوش ؟ واللا انت مستكتر على نفسك الجنة ؟ عليكم بقيام الليل فإنه دأب
الصالحين قبلكم ، و هو قربة إلى ربكم ، و مكفرة للسيئات و منهاة عن الإثم
وافضل عبادة امتى تلاوة القرأن

اييييييه رايح فين اوعى تخرج من التوبيك حسيت بالملل دلوقتى وانت بتقرأ حاجات فالدين
انما كنت هتفطس من الضحك من دقيقتين وانت بتقرأ النكت
بدل ما تهرب من الحقيقة واجهها وصلحها ولا المواجهة والتحدى تبقى فى امور الدنيا بس عشان تجيب شقة وتتجوز وتركب عربية

فى حين انك لو صلحت دينك كل دة هيجيلك وانت مكانك بتعمل اللى عليك بس بدون مجهود زيادة

اصبر انت لسة هتاخد كلام كتير عشان تفوق

ليه
بتصحى كل يوم الساعة ستة عشان الكلية وتفوت صلاة الفجر دى هى ساعة يا مؤمن
ممكن تعوضها انك تنامها بدرى لو هتفرق معاك اوى كدة يعنى
دة النبى بيقلك ركعتا الفجر خير من الدنيا وما فيها وبرضه بيهون عليك تسيبهم

ليه دايما منزلة المراقبة ضايعة عندنا وبنراقب الناس فى اعمالنا اكتر ما بنراقب ربنا
يَسْتَخْفُونَ
مِنَ النَّاسِ وَلا يَسْتَخْفُونَ مِنَ اللَّهِ وَهُوَ مَعَهُمْ إِذْ
يُبَيِّتُونَ مَا لا يَرْضَى مِنَ الْقَوْلِ وَكَانَ اللَّهُ بِمَا
يَعْمَلُونَ مُحِيطًا

ليه او مايظهر اعلان عن رحلة نجرى بسرعة عشان نحجز ولو معناش الفلوس نزن على ودان اهالينا لحد ماناخد الفلوس
وبيصعب علينا نحط جنيه فالمسجد او نساعد المحتاج
الصدقة تطفئ الخطيئة كما يطفئ الماء النار

ليه فى اى قعدة مبتسحملش تسمع كلام عن الدين او الالتزام انما تتكلم فاى حاجة تانى
ما هو دة لو بسبب تقصير منك هتفضل لحد امتى تهرب عمرك محدود ولازم توصل لمرحلة
وَاتَّقُواْ يَوْمًا تُرْجَعُونَ فِيهِ إِلَى اللّهِ ثُمَّ تُوَفَّى كُلُّ نَفْسٍ مَّا كَسَبَتْ وَهُمْ لاَ يُظْلَمُونَ

ليه دايما لو سألت واحد بتحب ربنا بدون تفكير يرد يقول طبعا
انما افعالنا متدلش على كدة خالص انما فى معظم الامور الا من رحم ربى نطيع الشيطان وجنده من الانس والجن
يا اخى ان المحب لمن يحب مطيع

تجيلك رسالة عالميل ولا بوست من صفحة عالفيس تقراهم وتهتم انما مجرد انك تشم فيهم ريحة الدين
تقوم ماسح علطول

وناس كتير تحب تشغل الاغانى فى العربية والازاز مقفول ويعيش اللحظة
طب جربت تشغل قرأن وتعيش معاه برضه
والله احلى كتييييييييييييييير

اما المساجد فلها الله يبقى المسجد فاضى ومحدش بيدخله وبعديه بشوية قهوة ولا كافيه مليانة بشر
والله حاجة تحزن القلب بجد

دايما نبص ونجرح فى غيرنا وننسى ان لينا عيوب يمكن اكتر منه
قبل
ما تقول حاجة وحشة على مسلم افتكر ان الغيبة عقابها عظيم وقبل ما تظن
السوء في حد ... التمس لأخيك سبعين عذرا ... يمكن يوم تتحط مكانه ربنا
يعافينا

والناس اللى مشاعرها مرهفة وطايرة كدة وخصوصا كتير من البنات
تفضل تعيط من اغنية هجر وفراق او قدام سنوات الضياع والعشق الممنوع ولا نور ومهند ايام زمان
طب جربتوا تحسوا عذوبة القرأن وجمال وروعة معانيه
ياه لو البكاء دة يبقى شوقا للجنة او من خشية الله

تغضب وتتنطط وتقلب الدنيا لو حد غلط فيك او فى والدك
انما واحد يغلط فالنبى او يسب الدين او بيهاجم الدين
يا سيدى وانا مالى
ودن من طين وودن من عجين وبنعمل من بنها

الله المستعان

رائع بجد

موضوع مضحك اوى بس يا ريت تقروه للاخر بالله عليكم 26034832e2463c973ff3